توو ئه‌و چه‌تره‌ی که‌ هاوڕێته‌ ڕۆژی ته‌م و باران و تاو
ده‌ستت ئه‌گرێ و جێت ناهێلێ ، تا ئه‌تداته‌ ده‌ستی هه‌تاو
توو ئه‌و ڕێیه‌ی یه‌که‌م هه‌نگاو ، ده‌ست پێده‌کات تا دڵی من
خۆزگه‌و ئاهم لێ ون نه‌که‌یت، بمخه‌یته‌ ناو ده‌ریای بێ بن
 وشکه‌داری چه‌ماوه‌ بووم ، بۆ ده‌ستی تۆ بووم به‌ گۆچان
تا له‌گه‌ڵتا ڕێگا بکه‌م ، به‌ دوورتکه‌م له‌ داچه‌مان
دڵم ئێستا وه‌کو ماسی له‌ تۆڕی تۆ نابێته‌وه‌
چاوم وه‌ک مۆم تا دواته‌مه‌ن به‌ سووتان بۆت ئه‌توێته‌وه‌
تازه‌ گوڵی چیم بۆ دێنی ، که‌ من دڵم هه‌ڵوه‌ریوه‌
له‌ هه‌واری خۆشه‌ویستی هیچ ئارامیم تیا نه‌دیوه‌
 عه‌شق وه‌کو ده‌ریا وایه‌ چه‌ن شه‌پۆل به‌ی له‌‌جێی خۆتی
له‌ باڵنده‌ی قه‌فه‌س ئه‌چێت، چه‌ن هاوارکه‌یت دیل و کۆتی
زۆر ئه‌ترسم ئیتر ناوم نه‌بیستمه‌وه‌ به‌ ده‌نگی تۆ
وابه‌جارێک کاڵ ببمه‌وه‌ هه‌رگیز نه‌گه‌م به‌ره‌نگی تۆ
  به‌ڵام من هه‌ر دیلی تۆم و قه‌ت ئازادیم ناوێته‌وه‌
دڵم ڕه‌گی لای تۆ دانا هه‌ڵیکه‌نی ناڕوێته‌وه‌
من دڵۆپێک ئاشکی ته‌ڕ بووم ، که‌وتمه‌ ده‌ریای چاوانته‌وه‌
باڵدارێکی بێ لانه‌ بووم ، باڵمدا به‌ ئاسمانته‌وه‌
وه‌ک دواگه‌ڵای چڵی شاتوو به‌ شه‌ماڵت هاتمه‌ سه‌ما
گه‌ر بۆ ساتێک ده‌ستم به‌رده‌ی ئه‌مرم له‌ ناو ئه‌شک و خه‌ما
ئاسوده‌م تا گیان بسپێرم ،هه‌ر ئه‌وه‌نده‌ی زوو بگه‌م پێت
به‌ وه‌رینیش بۆ لای تۆ دێم ، به‌ مردنیش دێمه‌ سه‌ر ڕێت
ئه‌ی خۆره‌تاو هه‌ر بۆ ساتێک له‌ به‌رزیتا وه‌ره‌ خوارێ
تا بزانی چه‌ند به‌ژانه‌ ئاوابوونی لای ئێوارێ
تا ببینی چۆن گه‌ڵاکان ده‌ست له‌ ده‌ستی یه‌ک به‌رناده‌ن
چۆن باوبۆران به‌ ته‌زیویش دواسات بێ ماچ قه‌ت هه‌ڵناکه‌ن
دڵنیابه‌ من به‌فرێکم ، له‌ ناو پێکتا تووامه‌وه‌
ڕێگایه‌کی داخراو بووم ، له‌سه‌ر ڕێی تۆ کرامه‌وه‌
تازه‌ له‌ ناو شه‌وو ڕۆژتا یادگاری من داگیرساوه‌
ناونیشانم هه‌ڵبه‌ستێکه‌ ، له‌ ناو دڵتا به‌جێماوه‌
چۆن ئه‌توانی ره‌زی شیعرو باخی وشه‌م فه‌رامۆشکه‌ی
بێ ئاواز و گۆرانی من به‌ عه‌شقی تر دوا پێک نۆشکه‌ی
کێ وه‌کو من له‌ تاریکیت ، خۆری کرد به‌ کانی چاوت
کێ وه‌کو من دیوانێکی پڕ گۆرانی کرد به‌ ناوت
له‌ دووره‌وه‌ کێ تۆی برده‌ به‌ر ئاوێنه‌ی ڕوونی کانی
له‌ گریان و پێکه‌نینا ، وه‌رزی دڵی تۆی ئه‌زانی
له‌ دڵته‌نگی بارانت بووم له‌ خۆشیدا هه‌ر گۆرانی
وه‌کو گه‌ڵا زوو هه‌ڵوه‌ریم ، که‌وتمه‌ سه‌ر ڕێت به‌ ئاسانی
یه‌که‌م حه‌رفی ناوه‌که‌ی تۆ بو به‌ شیرینی زمانم
به‌ڵام گوڵێ دڵنیابه‌ من به‌ بێ تۆ سه‌رگه‌ردانم
‌نه‌که‌ی بڕۆی به‌جێم بێڵی دوا ئاوازم بکه‌ی به‌ شین
من سه‌رمه‌ستم به‌ ناوی تۆ لێم مه‌به‌سته‌ ده‌رگای ئه‌وین
یادت ماوه‌ تۆ خۆت وتت من به‌ خۆرت ئه‌کرێمه‌وه‌
وه‌کو به‌فر له‌ ناو گڕی ته‌نیایتا ئه‌توێمه‌وه‌
چۆن فرمێسکێک که‌ ئه‌وه‌رێ ناچێته‌وه‌ ناو چاوانت
یا که‌ رۆژێک تێئه‌په‌ڕێ نایه‌ته‌وه‌ سه‌ر ژیانت
بڕوا بێنه‌ به‌و قه‌ده‌ره‌ی که‌ من و تۆی به‌یه‌ک ناسان
به‌و ئه‌وینه‌ی به‌ هێمنی هاته‌ دڵت زۆر به‌ ئاسان
بڕوا بێنه‌ به‌ هاتنه‌وه‌و گه‌ڕانه‌وه‌ی به‌فری ئه‌مساڵ
به‌و هه‌ڵبه‌سته‌ی به‌ شێتانه‌ چاوه‌ڕێته‌ وه‌کو مناڵ
به‌و نامه‌یه‌ی که‌ باڵ ده‌گرێ تا ده‌گاته‌ دووره‌ وڵات
وه‌ک چیرۆکی ئه‌فسانه‌یی تا به‌ ده‌ستی خه‌یاڵ ده‌گات
توو ئه‌و خۆره‌ی له‌ چاوتایه‌ تو ئه‌و هه‌سته‌ی له‌ ناختایه‌
له‌ ئێستاوه‌ تا هه‌میشه‌ ده‌رگای دڵم ئاواڵایه‌
منیش ئاوا له‌سه‌ر ڕێتا باڵدارێکی هه‌ڵکورماوم
به‌ڵام چیبکه‌م بۆ له‌ باڵدان کۆترێکی باڵبه‌ستراوم
توو به‌هارێک که‌ چاوه‌ڕێی له‌ سه‌ر ئه‌سپی خه‌یاڵم بیت
که‌ هاتییه‌وه‌ ئاراممکه‌ ته‌نیا چرای ناو ماڵم بیت
تۆ له‌ دڵمای به‌ڵام چیبکه‌م که‌ من هێشتا له‌ خۆم دوورم
له‌وه‌ته‌ی هه‌م دڵشکاوم له‌ ناو عومری سه‌وز و سوورم
له‌ به‌هارا ڕه‌نگم دانا له‌گه‌ڵ به‌فرا دڵم ته‌زی
به‌ نیگای خۆر تووامه‌وه‌ ، له‌ پاییزا چاوم وه‌ری
ڕووبار هات و به‌جێی هێشتم ئاوڕی لێم نه‌دایه‌وه‌
خۆر به‌ خه‌نده‌ له‌ من هه‌ڵهات شه‌وی هێنا به‌ دوایه‌وه‌
تۆ نه‌تدیوه‌ که‌ په‌پووله‌ به‌ عه‌شقه‌وه‌ بۆ مۆم ده‌چێ
به‌ڵام ئه‌و زۆر بێباکانه‌ ئاگر به‌سه‌ر دڵیا ئه‌نێ
تۆ بڕوانه‌ هه‌نگه‌زه‌رده‌ ، که‌ به‌سه‌ر گوڵ ئه‌خولێته‌وه‌
شه‌ماڵ ده‌ستی چڵی ئه‌گرێ و گوڵ له‌ ماچ دوور ئه‌خرێته‌وه‌
من له‌ ده‌رگای گۆرانیمدا فرمێسکم لێ کرایه‌وه‌
له‌و شوێنه‌ی گوڵی تیا وه‌ری دڕکێکی لێ ڕووایه‌وه‌
باسی خونچه‌و چرۆ مه‌که‌ من به‌هارم له‌ ده‌ست داوه‌
زه‌رده‌خه‌نه‌م که‌وته‌ ژێر لێو چرایه‌کی کزکراوه‌
عه‌شق به‌فری پێش بارینه‌، که‌ گه‌شته‌ خاک ئه‌توێته‌وه‌
چاوی کز و دڵی پڕه‌ هه‌ر به‌ گریان ئه‌کرێته‌وه‌
هه‌راسان بووم چونکه‌ عه‌شق سه‌رابێکی پڕ غوباره‌
وه‌ک ڕه‌شه‌بای سلێمانی گۆڵ شکسته‌ی ناو به‌هاره‌
ئیتر به‌ گوڵ فریو ناخۆم بۆنی دیاره‌ بێ وه‌فایه‌
ساتێک له‌گه‌ڵ په‌پووله‌داو ساتێک له‌گه‌ڵ شه‌ماڵدایه

                                                                                           ئه‌حمد محمد